Паёми табрики Раҳмон ва Макрон ба якдигар ба муносибати 30-юмин солгарди равобити дипломатӣ

Эмомалӣ Раҳмон ва Эммануэл Макрон дар остонаи 30-юмин солгарди истиқрори равобити дипломатӣ ба ҳамдигар паёмҳои муҳим ирсол карданд.

Эмомалӣ Раҳмон ва Эммануэл Макрон, раисони ҷумҳуриҳои Тоҷикистон ва Фаронса дар остонаи 30-юмин солгарди истиқрори равобити дипломатӣ ба ҳамдигар паёмҳои муҳим ирсол карданд.

Ба нақл аз Авесто, миёни раисҷумҳури Тоҷикистон Эмомалӣ Раҳмон ва раисҷумҳури Фаронса Эммануэл Макрон мубодилаи барқияҳои табрикӣ сурат гирифт. Сарони ду кишвар ҳамдигарро ба муносибати 30-юмин солгарди барқарории муносибатҳои дипломатӣ байни давлатҳо табрик гуфтанд.

Дар изҳороти Эмомалӣ Раҳмон омадааст: «Мо аз рушди пайвастаи муносибатҳои байнидавлатӣ ва ҳамкориҳои гуногунҷанбаи мутақобилан судманди кишварҳоямон, ки дар ин давра ҷанбаҳои нави созанда касб кардаанд, қаноатмандем».

Раисҷумҳури Тоҷикистон афзуд, тавсеа ва таҳкими минбаъдаи равобиту ҳамкорӣ бо Фаронса яке аз самтҳои муҳими сиёсати хориҷии ҷумҳурӣ мебошад.

Ӯ изҳори умедворӣ кард, ки ҷидду ҷаҳди якҷоя натиҷаҳои самарабахш хоҳад дод ва ба роҳбари Фаронса саломатию муваффақиятҳои нав, ба халқи дӯсти Фаронса сулҳу амонӣ ва шукуфоӣ орзу намуд.

Дар навбати худ Макрон инчунин ба Раҳмон барои тамоми талошҳо баҳри рушди муносибатҳои байни давлатҳо, аз ҷумла дар соҳаи фарҳанг изҳори сипос кард.

Дар барқияи шодбошӣ гуфта шудааст: «Ман шодам, ки дар соли равон мубодилаи сиёсӣ, фарҳангӣ ва иқтисодии мо, аз ҷумла ба шарофати сафари Шумо ба Париж дар моҳи октябр вусъат ёфт».

Вай ёдовар шуд, ки намоиши «Тоҷикистон — мамлакати дарёҳои тилоӣ» дар осорхонаи ба номи Гимети санъати Осиё дар Париж бо муваффақияти калон гузашт.

Ба гуфтаи ӯ, ин аз фаъолияти тӯлонии ду намояндагии бостоншиносии Фаронса дар Тоҷикистон ва ҳамкориҳои хеле хуб дар ин замина шаҳодат медиҳад.

Макрон ҳамчунин дар барқияаш хостори идомаи муколамаи стратегӣ оид ба вазъи Афғонистон ва таъсири он ба амнияти минтақаи Осиёи Марказӣ, ки қаблан оғоз бахшида буданд, шудааст.

Ӯ гуфтааст, ки Фаронса суботи минтақаиро дар Осиёи Марказӣ ҳаётан муҳим медонад.