СААД дар пайи эҷоди воҳиди нави мудофиавӣ
Созмони Паймони Аҳдномаи Амнияти Дастаҷамъӣ қасд дорад ба сабаби ба вуҷуд омадани далелҳо воҳиди нав дар сохтори ин созмон эҷод кунад.
Вазири мудофиаи Беларус, Виктор Хренин эълон кард, ки Созмони Паймони Аҳдномаи Амнияти Дастаҷамъӣ (СААД) дар охири соли равон як воҳиди нав дар сохтори СААД эҷод хоҳад кард.
Ӯ дар суҳбат бо рӯзномаи низомии «Во славу Родины» изҳор доштааст, ки воҳиди ҷадид мудофиаи радиатсионӣ, кимиёӣ ва биологиро фаро хоҳад гирифт.
Хренин зикр намудааст, ки зимни амалиёти низомии Русия дар Украина пажуҳишгоҳҳои биологӣ ошкор шуда, далелҳои раднопазир ба даст омадаанд.
«Самтҳои нави рушди созмон истодагарӣ дар баробари хатарҳои биологӣ мебошад. Дар зимн то охири сол воҳиди мудофиаи радиатсионӣ, кимиёӣ ва биологӣ ташкил мешавад»,-афзуд ӯ.
Вазири дифои Белорус ҳамчунин пешгӯӣ намудааст, ки СААД густариш хоҳад ёфт ва теъдоди аъзои он ба даҳҳо давлат хоҳад расид.
Феълан СААД Арманистон, Беларус, Қазоқистон, Қирғизистон, Русия ва Тоҷикистонро шомил мешавад.
Аҳдномаи амнияти дастаҷамъӣ 15 майи соли 1992 дар шаҳри Тошканд аз сӯйи роҳбарони 6 кишвари ИДМ — Арманистон, Қазоқистон, Қирғизистон, Русия, Тоҷикистон ва Ӯзбекистон имзо гардид. Сентябри соли 1993 ба он Озарбойҷон ва моҳи декабри он сол Гурҷистону Белорус ҳамроҳ шуданд. Созишнома аз 20 апрели соли 1994 мавриди амал қарор гирифт.
Моҳи апрели соли 1999 танҳо 6 давлат протокол дар мавриди тамдиди аҳдномаи амнияти дастаҷамъӣ имзо карда, Ӯзбекистон, Гурҷистон ва Озарбойҷон худдорӣ намуданд.
Рӯзи 14 майи соли 2002 Шӯрои амнияти дастаҷамъӣ дар Маскав барои табдил ба созмони байналмилалии минтақаӣ таҳти унвони Созмони Аҳдномаи Амнияти Дастаҷамъӣ қарор қабул карду 18 сентябри соли 2003 оинномаи СААД мавриди амал қарор гирифт.
